Hanubatu! Nagka-monthly period lang ako pero bakit parang nagka amnesia din ako. Na-forget ko may blog pa pala akong dapat alagaan. Nagbisi-bisihan ako sa bagong grupo namin. Para akong si Kengkay na kating-kati para makipag kulitan sa bagong-gawa na WordPress Pinoys Forum.

Oist! mga minamahal kong mamboboso ng blog ko… join or visit us sa forum site namin. Masaya doon. May meryenda para sa mga bisita. Magpapa-raffle din kami ng isang unit ng condominium at trip to Jerusalem Europe sa jo-join sa amin. Bwahaha! Joke lang.

Heniways, netong weekend lang, trip ko sana pumunta ng mall para mag shopping. Hindi natuloy kasi naalala ko, kelangan pala may pera pag mag sa-shopping. Credit card? Alaws ako nun. SM Advantage card lang meron ako. Since wala akong salapi binuro ko na lang sarili ko sa bahay at nag hopping na lang ng blogs. hehehe! Nawala ang “s” sa shopping ko.

Nagpalipat-lipat ako sa iba’t ibang blogs pero lurker mode lang. Kumbaga, tahimik lang na naki-usyoso o naki-tsismis na nagbabasa. May iisa akong napansin sa mga blogs na napuntahan ko - Graveh, ang gagaling nilang lahat!

Sa mga nadaanan ko, yung ibang bloggers eh ang husay nila mag-express ng sarili nila sa blog lalo na pag malungkot sila o kaya may dinadalang problema. Feel na feel ko siempre yung pag i-emote nila ng mala-Pasan-Ko-Ang-Daigdig nilang drama sa buhay. At inggit ako.

Hindi ako nainggit sa mga problema nila, dahil kung problema din lang ang pag uusapan… bah! kumbaga sa puno, hitik ako nyan! Mayaman. Di hamak na mas sagana ako sa problema kesa sa kanila so papano naman ako maiinggit? Lols.

Inggit ako dahil ang galing nila magpalabas ng mga saloobin. Talagang naging outlet nila ang blog sa mga hinanakit. Ako man ay may mga dinadala din at hinaharap na problema. Mas malala pa nga kung ikukumpara dun sa mga nabasa ko. Pero tanong ko sa sarili ko - bakit di ko maisulat yung sa akin? Hindi ko rin masabi sa iisa at kalahati kong kaibigan ang mga bumabagabag sa sarili ko. (Hanef! repeat after me pipol, bu-ma-ba-ga-bag!) Ang lalim!

Binalikan ko tuloy yung mga sentimental entries ko dati. Binasa ko ulit kung magaling ba ako mag-emote sa blog. Kaso hindi eh, parang nakakatawa pa nga ang dating. Hay kalamay! Tsaka pati comments kenkoy din. Henakow….pang sex-comedy lang yata talaga ang category ng talent ko sa blogging at hindi pang-drama.